Rúnar Alex Rúnarsson stóð vaktina í marki enska liðsins Arsenal er liðið heimsótti norska liðið Molde í Evrópudeildinni í gær.

Nicolas Pepé kom Arsenal yfir með marki á 50. mínútu. Reiss Nelson tvöfaldaði síðan forystu Arsenal með marki á 55. mínútu. Það var síðan ungstirnið Folarin Balogun sem innsiglaði 0-3 sigur Arsenal með marki á 83. mínútu. Arsenal er eftir leikinn í 1. sæti B-riðils með fullt hús stiga eftir 4 leiki. Þetta var annar leikur Rúnars fyrir félagið.

Rúnar fær lof fyrir frammistöðu sína og fær meðal annars 7 í einkunn hjá Sky Sports. Stjóri hans, Mikel Arteta var ánægður með íslenska markvörðiinn.

„Hann er að aðlagast leik okkar, hann er með stóran karaktar og það sást í þessum leik. Rúnar er hugrakkur en er líka með mikil gæði í löppunum. Hann er tilbúinn að taka áhættu þegar hann sér möguleika á því. Hann á bara eftir að bæta sig,“ sagði Arteta að leik loknum.

Bernd Leno hefur átt stöðuna í marki Arsenal en getur Rúnar Alex tekið hana? „Þetta veit maður aldrei, Rúnar þarf að eiga það skilið. Það er mikil samkeppni og það er undir þeim komið.“

Rúnar Alex og félagar áttu að halda til Lundúna eftir leik en vegna þoku sat liðið fast í Noregi í nótt og vonast til að komast til London síðar í dag.