Mohamed Salah kantmaður Liverpool hefur jafnað sig af COVID-19 á afar skömmum tíma og getur leikið með liðinu gegn Atalanta í Meistaradeildinni í vikunni.

Salah greindist ítrekað með veiruna í verkefni með landsliði Egyptalands í síðustu viku. Hann snéri aftur til Englands í einkaflugvél og fór í próf fyrir veirunni. Hún mælist ekki lengur í honum.

„Hann var neikvæður í dag, hann er kominn á sama stað og við með þessi próf. Það er UEFA próf á morgun fyrir Meistaradeildina og hann getur æft með okkur,“ sagði Jurgen Klopp stjóri Liverpool eftir sigurinn á Leicester í gær.

„Ég veit ekki hvort hann sé aftur prófaður af deildinni líka. Hann fer í tvö próf á tveimur dögum og þetta ætti að vera í góðu lagi.

Salah hefur aldrei haft einkenni COVID-19 og því kom jákvæð niðurstaða mörgum á óvart. Flestir sem fá veiruna mælast með hana í sér næstu tvær vikurnar eða svo.