Íslenska U21 árs landsliðið er svo gott sem komið inn á Evrópumótið næsta sumar, þetta varð ljóst eftir að Ítalía vann góðan og sannfærandi sigur á Svíþjóð í kvöld.
Arnar Þór Viðarsson var að fara í gegnum sína fyrstu undankeppni með liðið endaði með 18 stig úr 9 leikjum. Leikur sem átti að fara fram gegn Armeníu í kvöld var frestað vegna ástandsins þar í landi. Miklar líkur eru á því að Armenía verði dæmt úr keppni sem myndi koma Íslandi í lokamótið.
Sigur Ítala varð til þess að Ísland endar í öðru sæti og ætti að fara beint inn á Evrópumótið ef UEFA tekur þá ákvörðun um að dæma Armeníu úr keppni. Fari svo að Ísland þurfi að spila við Armeníu mun sigur þar koma liðinu inn á EM.
Þessi hópur yrði sá annar í sögunni til að komast inn á lokamótið en gullkynslóð Íslands með Gylfa Þór Sigurðsson og félaga í fararbroddi var fyrst til að fara inn á mótið árið 2011.