„Íslenska stjarnan Rúrik Gíslason er það mikill hjartaknúsari að hann hefur fengið tilboð frá konum sem vilja kaupa sæðið hans. Þessi 32 ára gamli maður hefur ákveðið að hætta í fótbolta og hefur áhuga á að gerast leikari,“ það er svona sem umfjöllun The Sun í Englandi hefst. Þar er fjallað um þá ákvörðun að Rúrik Gíslason sé hættur í knattspyrnu.
Rúrik lék síðast með Sandhausen í Þýskalandi en samningur hans þar rann út í sumar. Á ferli sínum lék Rúrik með Anderlecht, Charlton, FCK og fleiri liðum.
„Fótboltalega séð er akkúrat ekkert fram undan. Ég tók þá ákvörðun fyrir dálitlu síðan að skórnir færu bara einfaldlega á hilluna. Það er stór ákvörðun og auðvitað útilokar maður aldrei að skórnir verði teknir niður af hillunni einhvern tímann aftur það verður ekki núna,“ sagði Rúrik um hvað væri framundan.
Hann lék 53 leiki fyrir íslenska A-landsliðið og skoraði þrjú mörk. Rúrik öðlaðist heimsfrægð fyrir tveimur árum þegar Ísland lék á HM í Rússlandi.
Fleiri erlendir miðlar fjalla um ákvörðun Rúriks. „Fyrrum leikmaður Charlton varð heimsfrægur á einni nóttu á HM 2018 og er með yfir 700 þúsund fylgjendur á Instagram,“ segir í Frétt The Sun.
Í frétt The Sun er fjallað um að kona hafi viljað kaupa sæði hans eftir HM í Rússlandi. Rúrik varð þá heimsfrægur og sérstaklega í Suður-Ameríku eftir að hafa komið inn sem varamaður í fyrsta leik gegn Argentínu.
„Eftir leikinn fór ég að skoða símann, það var mikið af fyrirspurnum um hitt og þetta. Ein af þeim var um hvort ég væri til í að leggja til sæðið mitt,“ er haft eftir Rúrik.
Rúrik er byrjaður að láta að sér kveða í viðskiptum en hann á hlut í Glacier Gin og Bökk fatalínunni. „Það er margt áhugavert í gangi fyrir framtíðina og ég þarf að taka ákvörðun um hvað ég geri,“ sagði Rúrik.
