Óttast er að Kári Árnason varnarmaður íslenska landsliðsins sé fótbrotinn en hann fór meiddur af velli í sigri liðsins á Rúmeníu í gær þegar Ísland tryggði sér sæti í úrslitaleik um laust sæti á EM.

Kári fór haltrandi af velli undir lok leiksins og fer í myndatöku síðar í dag. Þetta kemur fram á RÚV.

„Kári var hins vegar ekki góður, það verður bara að segjast. Við þurfum bara að vona það besta með hann. Við sjáum það seinni partinn. Hann fer í myndatöku í dag til að sjá hvort það sé eitthvað brot þarna. Vonandi er það ekki,“ sagði Freyr Alexandersson aðstoðarlandsliðsþjálfari Íslands við RÚV.

Ef Kári er brotinn verður að teljast ansi ólíklegt að hann geti tekið þátt í leiknum gegn Ungverjalandi í nóvember, en leikið er ytra tólfta nóvember.