,,Mér fannst við sterkir og góðir með boltann, rólegir með boltann. Vorum að skapa mikið af færum með þessari ró okkar, skipulagið varnarlega hefur verið gott í mörg, mörg ár. Geggjuð frammistaða varnarlega, skapa ekkert færi úr opnum leik,“ sagði framherjinn Alfreð Finnbogason kátur eftir 2-1 sigur á Rúmeníu í kvöld. Íslenska liðið er nú einu skrefi frá Evrópumótinu á næsta ári, úrslitaleikur gegn Ungverjalandi í nóvember bíður.
Gylfi Þór Sigurðsson skoraði bæði mörk Íslands í fyrri hálfleik. „Þetta er ekki í fyrsta sinn sem hann gerir þetta, það er frábært að vera framherji með svona leikmenn sem sér alltaf einn eða tvo leiki fram í tímann. Slúttin hans eru svo frábær, það er oft algjört grín að fylgjast með þessu hjá honum á æfingum.“
59 stuðningsmenn fengu að mæta á völlinn og um það munar. „Það munar gríðarlega miklu, þetta er svipað í Þýskalandi hjá mér. Þar er byrjað að hleypa inn og það er ótrúlegt hversu miklu þetta munar. Við erum sáttir með að þessir hafi fengið að mæta.“
Þetta íslenska landsliðið er nú einu skrefi frá sínu þriðja stórmóti í röð. „Maður er búinn að finna það í vikunni, þegar menn koma saman að það er svo mikil rútína. Það þarf ekkert að ræða þetta of mikið, það er góður taktur. Það er búið að halda í sama kjarna í átta ár. Það er ótrúlegt hungur í gamla bandinu að komast inn á eitt stórmót í viðbót.“