Keppni á Íslandsmótunum í knattspyrnu hefur verið hætt eins og KSÍ greindi frá í dag.

Breiðablik eru Íslandsmeistarar og Valskonur lenda í öðru sæti. Blikakonur og Valskonur eru áberandi á lista yfir markahæstu leikmenn sumarsins.

Agla María Albertsdóttir og Sveindís Jane Jónsdóttir, leikmenn Breiðabliks, eru markahæstar í Pepsi-max deild kvenna 2020 með 14 mörk í 15 leikjum. Elín Metta Jensen, leikmaður Vals, er þriðja markahæst með 13 mörk í 16 leikjum.

4,4 mörk í leik

Íslandsmeistarar Breiðabliks voru iðnar við markaskorun í sumar. Þær skoruðu 66 mörk í 15 leikjum. Það eru 4,4 mörk í leik.

Leita þarf aftur til ársins 2013 til að finna aðra eins markaskorun.  Árið 2013 varð Stjarnan Íslandsmeistari með fullt hús stiga í 18 leikjum. Það sumar skoruðu þær 69 mörk. Það eru 3,8 mörk í leik.

Til að finna betra hlutfall en í ár þarf að leita áratug aftur í tímann. Árið 2010 varð Valur Íslandsmeistari. Þær skoruðu 82 mörk í 18 leikjum. Það eru 4,5 mörk í leik.

Fyrirmyndar varnarleikur

Varnarleikur Breiðabliks var líka til fyrirmyndar í sumar. Þær fengu á sig þrjú mörk í 15 leikjum. Það eru 0,2 mörk í leik. Sonný Lára Þráinsdóttir stóð vaktina í marki Breiðabliks.

Til að finna annan eins varnarleik í efstu deild kvenna þarf að leita til ársins 2015. Þá varð Breiðablik einnig Íslandsmeistari. Það ár fengu þær á sig fjögur mörk í 18 leikjum. Það eru 0,22 mörk í leik. Sonný Lára stóð einnig í markinu árið 2015.