Tveimur leikjum er lokið í 2. umferð riðlakeppni Meistaradeildar Evrópu í kvöld. Chelsea átti ekki í vandræðum er liðið vann 0-4 útisigur á Krasnodar í Rússlandi. Frönsku meistararnir í PSG unnu síðan 0-2 sigur á tyrkneska liðinu Istanbul Basaksehir.
Krasnodar tók á móti enska úrvalsdeildarliðinu Chelsea í E-riðli. Chelsea fékk vítaspyrnu á 14. mínútu. Jorginho tók spyrnuna en brást bogalistin.
Fyrsta mark leiksins kom á 37. mínútu, þar var að verki Callum Hudson-Odoi sem skoraði eftir stoðsendingu frá Kai Havertz. Chelsea fékk síðan aðra vítaspyrnu á 76. mínútu, nú tók Timo Werner spyrnuna og hann kom Chelsea í stöðuna 0-2.
Hakim Ziyech bætti við þriðja marki Chelsea með marki á 80. mínútu og Christian Pulisic innsiglaði 0-4 sigur liðsins með marki á 90. mínútu.
Chelsea situr í 1. sæti riðilsins með 4 stig eftir 2 leiki.
Í H-riðli tók Istanbul Basaksehir á móti frönsku meisturunum í PSG. Moise Kean kom franska liðinu yfir með marki á 64. mínútu. Hann var síðan aftur á ferðinni er hann innsiglaði 0-2 sigur PSG með marki á 79. mínútu.
PSG er sem stendur í 2. sæti riðilsins með 3 stig eftir tvo leiki. Seinna í kvöld mætast Manchester United og RB Leipzig og úrslitin úr þeim leik gætu fært PSG neðar í riðlinum.
E-riðill
Krasnodar 0 – 4 Chelsea
0-1 Callum Hudson-Odoi (’37)
0-2 Timo Werner (’76)
0-3 Hakim Ziyech (’80)
0-4 Christian Pulisic (’90)
H-riðill
Istanbul Basaksehir 0 – 2 PSG
0-1 Moise Kean (’64)
0-2 Moise Kean (’79)
