Mesut Özil miðjumaður Arsenal á sér enga framtíð hjá félaginu og gæti hafa spilað sinn síðasta leik fyrir félagið. Arsenal skilaði í gær inn leikmannalista sínum fyrir ensku úrvalsdeildina og Özil kemst ekki á 25 manna lista félagsins.
Özil er með yfir 60 milljónir króna í laun á viku en Mikel Arteta hefur ekki áhuga á að nota hann. Miðjumaðurinn frá Þýskalandi hefur ekkert spilað á þessu tímabili og hefur varla komið við sögu á þessu ár eftir að Arteta tók til starfa.
Honum sárnar meðferðin mjög og hefur sent frá yfirlýsingu. „Það er erfitt að skrifa stuðningsmönnum Arsenal þessi skilaboð eftir að hafa verið hérna um langt skeið. Ég er sár yfir þeirri staðreynd að ég komist ekki í þennan hóp fyrir ensku úrvalsdeildina, ég skrifaði undir nýjan samning við Arsenal árið 2018 og vildi þar sanna ást mína og hollustu við félagið. Það særir mig að fá það sama ekki til baka, það er lítið traust,“ sagði Özil.
„Ég var ánægður með hvernig hlutirnir gengu undir stjórn Mikel Arteta fyrir kórónuveiruna. Þetta var á góðri leið og ég spilaði vel, ég fæ í dag ekki að spila fótbolta með Arsenal.“
„London er mitt heimili, ég á góða vini í liðinu og finn sterka tengingu við stuðningsmenn okkar. Ég mun halda áfram og berjast fyrir því að fá tækifæri, ég læt ekki mitt áttunda ár hérna enda svona,“ sagði Özil í yfirlýsingu sinni.
〽️⚽️ #M1Ö #YaGunnersYa pic.twitter.com/hF7abGklOT
— Mesut Özil (@MesutOzil1088) October 21, 2020