Arnar Gunnlaugsson þjálfari Víkings í efstu deild karla í knattspyrnu segist hafa gert mistök í aðdraganda Íslandsmótsins þegar hann sagði Víkinga eiga möguleika á því að vinna deildina. Þetta kemur fram í mjög svo áhugaverðu viðtali við sem Elvar Geir Magnússon ritstjóri Fótbolta.net tók við Arnar í gær.
Arnar viðurkenndi mistök sín eftir tapið gegn KR í gær en Víkingum var spáð um miðja deild fyrir mót. Þá spá taldi Arnar vera tóma þvælu.
„Ég gerði mistök í aðdraganda þessa móts með því að tala okkur upp í titilbaráttu. Ég finn það núna. Þetta var ákveðið reynsluleysi í mér. Ekki að ég hafi ekki trúað því og strákarnir en þetta bjó til óþarfa spennu í hópnum, þeir voru yfirspenntir. Við vorum að fá á okkur fullt af rauðum spjöldum og menn urðu örvæntingarfullir þegar sigrarnir voru ekki að koma,“ sagði Arnar í viðtalinu við Fótbolta.net.
Arnar sagði fyrir mót að Víkingur væri með lið til að vinna deildina og sagðist ekki vera að tala með rassgatinu á sér, eins og hann orðaði það. Víkingar sitja nú í tíunda sæti deildarinnar. „Ég er ósammála þessari spá svo ég tali hreina íslensku. Við verðum pottþétt ofar en þetta,“ sagði Arnar þegar Fótbolti.net spáði þeim 5 sæti.
„Markmiðið er klárlega að berjast um titilinn. Þetta verður epic mót. Það er sjaldan sem ég man eftir svona mörgum liðum sem eiga góða möguleika. Stundum tala lið með rassgatinu og þykjast eiga góðaa möguleika en það eru sex lið sem eiga séns á titlinum, ef menn hitta á réttan dag og sleppa með meiðsli,“ sagði Arnar við Fótbolta.net 2 júní.
