Tom Brewitt, fyrrum akademíu leikmaður Liverpool, hefur nú viðurkennt að hann reyndi meðvitað að meiða liðsfélaga sinn svo hann gæti fengið tækifæri með aðalliðinu.
Brewitt segist hafa verið örvæntingafullur og að hann hafi viljað stíga upp í aðalliðið. Þegar stór hluti aðalliðsins glímdi við meiðsli á tímabilinu 2015/2016 sá Brewitt tækifæri. Jurgen Klopp, þjálfari Liverpool, þurfti að notast við leikmenn í akademíunni í næsta leik liðsins í FA bikarnum gegn Exeter. Brewitt vildi fá að spila þann leik en til þess þurfti hann að vera valinn fram yfir annan varnarmann, Daniel Cleary.
Brewitt ákvað að taka málin í sínar eigin hendur og meiða Cleary á æfingu svo hann myndi sjálfur fá tækifærið með aðalliðinu. „Ég ætlaði að gera hvað sem ég þyrfti að gera,“ sagði Brewitt í hlaðvarpinu . „Ef það þýddi að ég þyrfti að meiða einhvern eða eyðileggja samband mitt með einhverjum þá ætlaði ég samt að gera það. Ég var bara svo örvæntingafullur, ég varð að spila fyrir Liverpool og það var allt sem ég vildi nokkurn tíma gera.“
Í hlaðvarpinu sagði Brewitt frá því að þeir Cleary hefðu áður verið fínir félagar. „Ég og hann náðum alltaf vel saman en ef ég á að vera hreinskilin, þá held ég að ég hafi eyðilagt það samband. Ég tók ákvörðunina, það var ég eða hann, svo ég elti hann um á æfingum,“ sagði hann. „Milli jóla og nýárs þá setti ég sjálfan mig alltaf við hlið hans í leikjum á æfingum og sparkaði bara í hann. Ég var ekki að reyna að meiða hann illa, bara nógu mikið svo hann gæti ekki spilað leikinn.“
Brewitt segir að þegar um vika var í stóra leikinn hafi hann séð tækifæri til að meiða hann. „Þetta var slæm tækling – ég vissi að þetta væri slæm tækling, ég gerði þetta viljandi og ég er ekki rosalega stoltur af því. Ég skammast mín ekki fyrir þetta heldur samt, því ég hugsaði að þetta væri annað hvort ég eða hann og ég valdi mig.“
Þrátt fyrir að Cleary hafi ekki náð að spila þennan leik vegna meiðslana þá fékk Brewitt ekki tækifærið sitt. Hann uppskar það sem hann sáði og meiddist sjálfur seinna í vikunni en hann fékk heilahristing og gat ekki spilað í leiknum. Hann fékk aldrei tækifæri með aðalliðinu.