Everton og Liverpool gerðu 2-2 jafntefli í grannslag í ensku úrvalsdeildinni. Leikið var á Goodison Park í Liverpool í dag.
Gylfi Þór Sigurðsson byrjaði á varamannabekk Everton en kom inn á þegar 72. mínútur voru liðnar af leiknum.
Everton hafði unnið alla leiki sína í deildinni fram að þessu. Liverpool vildi komast aftur á beinu brautina eftir slæmt tap gegn Aston Villa í seinustu umferð.
Það var Sadio Mané sem kom Liverpool yfir með fyrsta marki leiksins er hann kom boltanum í netið eftir fyrirgjöf frá Andy Robertson á 3. mínútu.
Everton fékk hornspyrnu á 19. mínútu. James Rodriguez tók spyrnuna, hún rataði á kollinn á Michael Keane sem jafnaði leikinn fyrir heimamenn. Staðan í hálfleik var 1-1.
Á 72. mínútu barst boltinn til Mohamed Salah í vítateig Everton. Hann skaut að marki og kom Liverpool yfir.
Leikmenn Everton neituðu hins vegar að gefast upp. Á 81. mínútu Skoraði Dominic Calvert-Lewin sitt sjöunda mark í deildinni þegar hann jafnaði leikinn.
Á 88. mínútu fékk Richarlison, leikmaður Everton, rauða spjaldið fyrir tæklingu á Thiago Alcantara. Everton lék því manni færri síðustu mínúturnar.
Jordan Henderson, leikmaður Liverpool, kom boltanum í netið í uppbótartíma en markið var dæmt af vegna rangstöðu.
Fleiri mörk voru ekki skoruð, niðurstaðan því 2-2 jafntefli. Everton er eftir leikinn í 1. sæti deildarinnar með 13 stig. Liverpool er í 2. sæti með 10 stig.
Everton 2 – 2 Liverpool
0-1 Sadio Mané (‘3)
1-1 Michael Keane (’19)
1-2 Mohamed Salah (’72)
2-2 Dominic Calvert-Lewin (’81)
