Jóhann Berg Guðmundsson kantmaður Burnley er klár í slaginn þegar liðið heimsækir West Brom á mánudag í ensku úrvalsdeildinni.
Jóhann Berg var í byrjunarliði Íslands gegn Rúmeníu fyrir viku síðan en taldi sig ekki leikfæran gegn Dönum á sunnudag, hann fann örlítið til í náranum.
Jóhann hefur hins vegar náð bata og ætti að vera í leikmannahóp Burnley sem hefur tapað fyrstu þremur leikjum tímabilsins í deildinni.
West Brom hefur líka hikstað í upphafi móts og leikurinn á mánudag því mikilvægur fyrir bæði lið.
Sean Dyche stjóri Burnley sagði á fréttamannafundi í dag að íslenski kantmaðurinn verði klár í slaginn.
