Ísland háði hetjulega baráttu gegn besta landsliði í heimi á Laugardalsvelli í kvöld. Belgía vann 1-2 sigur á Íslandi í Þjóðadeildinni.

Undirbúningur Íslands fyrir leikinn var flókinn, sex lykilmenn voru meiddir eða yfirgáfu herbúðirnar eftir leikinn gegn Dönum á sunnudag.

Allt starfsliðs Íslands var svo sett í sóttkví í gær eftir að smit kom upp þar, liðið átti í vök að verjast framan af leik og Romelu Lukaku kom Belgum yfir með fínu marki eftir mistök í vörn Íslands.

Birkir Már Sævarsson jafnaði svo leikinn eftir frábær sendingu frá Rúnari Sigurjónssyni. Lukaku náði sér svo í vítaspyrnu þegar Hólmar Örn Eyjólfsson braut klaufalega af sér. Lukaku fór á punktinn og skoraði örugglega.

Staðan var 1-2 í hálfleik og þannig lauk leiknum. Fín frammistaða í Laugardalnum og eitthvað til að byggja á.

Plús og mínus er hér að neðan..

Plús:

Það urðu margir glaðir að sjá „gamla“ manninn Birki Má Sævarsson aftur í bláu treyjunni og hann átti frábæran leik. Markið gott og var sífellt ógnandi fram á við í síðari hálfleik.

Albert Guðmundsson var klókur að finna svæði á milli miðju og varnar Belga og var oft nálægt því að þræða samherja sína í gegn.

Hetjuleg barátta íslenska liðsins sem var þunnskipað og með kórónuveiruna hangandi yfir sér í aðdraganga leiksins. Vel gert strákar þó tapið hafi verið súrt.

Mínus:

Klaufaleg mistök hjá Herði Björgvini í fyrsta marki Belga þegar hann leggur boltann fyrir Romelu Lukaku og klaufalegt brot Hólmars í öðru markinu voru dýrkeypt.

Það var slæmt að sjá Birki Bjarnason og Hörð Björgvin Magnússon meiðast seint í leiknum, þriðji leikurinn þeirra á sex dögum á þungum Laugardalsvelli.

Ísland er með tapinu fallið úr A-deild í Þjóðadeildinni, það er fúllt að ná ekki betri úrslitum en möguleikar á sigurleikjum aukast með fallinu.