Íslenska landsliðið reið ekki feitum hesti gegn Dönum í Þjóðadeildinni þegar leikið var á Laugardalsvelli í kvöld. Ísland tapaði 3-0 og átti aldrei möguleika í leiknum.
Alfreð Finnbogason fór meiddur af velli snemma leiks og Danir skoruðu svo sitt fyrsta mark undir lok fyrri hálfleiks. EKki er öruggt að boltinn hafi farið inn en mistökin sem Hannes Þór Halldórsson gerði í aðdraganda þess voru dýr.
Botninn hrundi svo úr leik Íslands í síðari hálfleik. Frammistaða sem þessi dugar skammt ef liðið ætlar að vinna Ungverjaland í nóvember og komast inn á sitt þriðja stórmót.
Plús og mínus er hér að neðan.
Plús:
Frammistaða Guðlaugs Victors Pálssonar í hægri bakverðinum var aftur mjög góð, mikill kraftur og er byrjaður að taka meira og meira þátt í sóknarleiknum. Ljósið í myrkvi kvöldsins.
Mínus:
Það riðlaði leik liðsins að missa Alfreð Finnbogason af velli eftir tólf mínútuna leik. Fyrir Ísland að missa Alfreð út ofan á það að Jóhann Berg Guðmundsson var ekki leikfær er dauðadómur. Þessir tveir ásamt Gylfa eru líklegustu menn liðsins til þess að skapa færi og Gylfi og Alfreð eru alltaf líklegir til þess að skora.
Jón Daði Böðvarsson hefur fengið verðskuldað lof fyrir frammistöðu sínar með íslenska landsliðinu, það er hins vegar ótrúlegt að framherji sé leik eftir leik aldrei líklegur til þess að skora. Vinnusemi Jóns Daða hefur komið honum langt en hann mætti koma sér í færi svona við og við.
Fyrsta mark Dana í leiknum var slysalegt og kannski ólöglegt. Ómögulegt er að segja hvort boltinn hafi farið yfir línuna en mistök Hannes Þórs Halldórssonar í aðdraganda marksins voru slysaleg og eiga ekki að sjást hjá jafn öflugum markverði.
Varnarleikurinn í öðru marki Dana var svo barnalegur, íslenska liðið var galopið og ekki var mikið skipulag þegar Christian Eriksen rölti í gegn og skoraði.
Botninn úr leik liðsins hrundi svo þegar Aron Einar Gunnarson fór af velli í hálfleik, andlaust, aginn hvarf og menn misstu allt sjálfstraust.
Ljóst má vera að eftir góðan fimmtudag er þessi sunnudagur vond tíðindi fyrir Erik Hamren, svona frammistaða í nóvember og Ísland er ekki á leið á sitt þriðja stórmót.