Gareth Southgate þjálfari Englands hefur valið 30 manna leikmannahóp fyrir komandi verkefni í Þjóðadeildinni gegn Danmörku og Belgíu.

Phil Foden og Mason Greenwood eru ekki valdir í enska landsliðið fyrir komandi verkefni eftir næturbrölt sitt á Hótel Sögu með Nadíu Sif Líndal og Láru Clausen. Foden og Greenwood komust í heimsfréttirnar eftir að hafa brotið sóttvarnarreglur á Íslandi þegar enska landsliðið var hér á landi. Þeir félagar buðu Nadíu og Láru á hótelið sitt vitandi að þeir máttu ekki hitta neinn utan liðsins, þeir voru reknir úr landsliðshópnum eftir að greint var frá málinu.

Drengirnir eru ungir að aldri og Gareth Southgate þjálfari Englands telur að þeir hafi dregið lærdóm af næturbröltinu.

„Við höfum látið alla leikmenn vita að svona hegðun gengur ekki upp í okkar herbúðum. Við þurfum að koma þessum strákum aftur inn á beina braut, ungt fólk misstígur sig og þeir Foden og Greenwood hafa lært af þessu,“ sagði Southgate um málið.

Southgate talaði eins og drengirnir myndu aftur fá tækifæri hjá sér innan tíðar enda eru þeir vonarstjörnur enska boltans.

„Þeir eru ekki með okkur núna en það gefur þeim andrými til þess að komast í betri takt hjá félagsliði og njóta boltans. Ég mun ræða við þá eftir að þessu verkefni okkar lýkur en það verður aðeins rætt um fótbolta.“