Þrír markahæstu leikmenn efstu deildar karla í knattspyrnu á Íslandi eru erlendir ríkisborgarar. Steven Lennon framherji FH hefur skorað 17 mörk og leiðir kapphlaupið um gullskóinn.
Þar á eftir komu dönsku framherjarnir Patrick Pedersen hjá Val og Thomas Mikkelsen hjá Breiðabliki.
Í sætum fjög til sjö sitja svo þrír Íslendingar sem allir hófu tímabilið hér á landi en nú er búið að selja þá alla til erlendra félaga. Efstu Íslendingarnir í baráttunni um gull, silfur og bronsskóinn því allir farnir úr landi.
Tryggvi Hrafn Haraldsson sem hefur skorað 12 mörk fyrir ÍA hefur skrifað undir hjá Lilleström í Noregi, hann gerði stuttan samning við norska liðið eftir gott gengi á Akranesi.
Óttar Magnús Karlsson sem skoraði níu mörk fyrir Víking Reykjavík var seldur til Venezia á Ítalíu en liðið leikur þar í næst efstu deild.
Valdimar Þór Ingimundarson hafði skorað átta mörk fyrir Fylki í deildinni í sumar áður en hann var seldur til Strømsgodset í Noregi.
Í gær var svo Stefán Teitur Þórðarson seldur frá ÍA til Silkeborg í Danmörku en Stefán hafði laumað inn átta mörkum fyrir ÍA.
