Manchester City fór örugglega áfram í 16 liða úrslit enska bikarsins er liðið fék Fulham í heimsókn á Ethiad völlinn í fyrradag. Ballið var í raun búið áður en það hófst en Tim Ream fékk rautt hjá Fulham á sjöttu mínútu og Ilkay Gundogan skoraði úr vítaspyrnunni. Eftir það var ekki að spyrja að leikslokum, Bernardo Silva kom City í 2-0 í fyrri hálfleik. Gabriel Jesus bætti svo við tveimur mörkum í síðari hálfleik og sigur City sannfærandi.

Pep Guardiola var ósáttur með mætinguna hjá Stuðningsmönnum City en tæplega 17 þúsund tóm sæti voru á vellinum. Félagið á oft í vandræðum með að fylla kofann nema þegar stórleikir eiga sér stað, Guardiola vonast því eftir fullu húsi gegn Manchester United á miðvikudag. Liðin mætast þá í síðari leiknum í undanúrslitum enska deildarbikarsins.

,,Núna höfum við nokkra daga til að undirbúa United leikinn, vonandi geta stuðningsmenn okkar komið og fyllt völlinn,“ sagði Guardiola en City vann fyrri leikinn 3-1 og er því í frábæri stöðu.

Stuðningsmenn City eru óhress með Guardiola og þá staðreynd að hann sé að gagnrýna þá opinberlega. ,,Ég var hissa og veit ekki hvað Pep er að reyna að gera, hann er að ýta undir það að talað sé um Emptyhad. Þetta pirrar mig verulega,“ sagði Kevin Parker, sem stýrir opinberum stuðningshópi félagsins.

,,Okkur finnst gagnrýnin frá öðrum vera nógu mikil, að okkar eigin stjóri geri þetta. Það gerir hlutina bara verri, hann er ekki í neinum tengslum við fjárhagslegan raunveruleika stuðningsmanna.“

,,Pep verður að átta sig á því að það er verkafólk upp til hópa sem styður félagið, þetta fólk setur mikið af sínum peningum í fótbolta. Hættu að lemja okkur niður.“