Það vakti athygli í vikunni þegar Gunnleifur Gunnleifsson greindi frá því að hann yrði varamarkvörður og þjálfari hjá Breiðabliki á komandi leiktíð. Þannig fær Anton Ari Einarsson, trausti frá Óskari Hrafni Þorvaldssyni til að standa í búrinu.
Málið var krufið í Dr. Football en Anton kom til félagsins í vetur frá Val og fær traustið.
,,Það er orðið ljóst, að hann var ekkert að fara að spila í byrjunarliðinu. Þeir ákveða að taka þetta svona, ég sagði það sjálfur við Gulla fyrir viku. Að hann getur ennþá spilað, hinn getur meiðst. Með þessari yfirlýsingu er verið að segja að Anton Ari spili, sama hvort hann geti ekki neitt,“ sagði Mikael Nikulásson, sérfræðingur þáttarins.
,,Ég hefði ekki hætt, á þeim samningi sem Gulli er á og á eitt ár eftir. Ef hann væri með 30 þúsund á mánuði, þá hefði hann hætt.“
Gunnleifur gerði nýjan samning við Blika síðasta sumar áður en Óskar Hrafn tók við. ,,Samningurinn er gerður í júlí, þá er annar þjálfari hjá Breiðablik,“ sagði Kristján Óli Sigurðsson.
Hjörvar Hafliðason segir að Breiðablik ætti að fá yfirmann knattspyrnumála, þá myndi svona ekki gerast. ,,Þarna vantar stefnu, við erum að semja við frábæran leikmann en ætla ekki að nota hann á næsta ári. Ég hefði skoðað að fara eitthvað annað, ég held að hann sé að gera þetta til að hjálpa Antoni Ari. Anton hefur verið eins og taugahrúga í þessum leikjum, að vera með gamla manninn á bakinu getur verið erfitt. Anton hefur átt mjög erfitt uppdráttar.“
Mikael segir ljóst að þetta skref var stigið, eftir að Gunnleifi var tjáð að hann yrði bara á bekknum. ,,Það er búið að segja við Gulla að hann verði á bekknum, hluti af þjálfun og kannski meira næsta haust. Hann fær nýjan samning sem er sniðinn að því sem hann er að gera. Þekkjandi Gulla, keppnismaður. Þá mætir hann ekkert allt í einu að styðja Anton Ara, hann ætlaði að slá hann út úr liðinu fyrir tveimur vikum. Þeir eiga að berjast um stöðuna.“