,,Haustið 2018 hætti ég á góðum vinnustað til þess að sækjast í meiri áskorun á sjálfan mig. Ég hafði verið að vinna á góðum stað en samt sem áður á stað sem ég í raun þekkti of vel. Ég tók ákvörðun á að þrýsta mér úr boxinu á allan mögulegan hátt. Ég endaði á því að fá frábæra vinnu þar sem ég var umvafinn góðu fólki. Á sama tíma ákvað ég að sækja um nám í Noregi sem ég fékk inngöngu í,“ skrifar Óli Stefán Flóventsson, þjálfari KA í ítarlegum pistli á Hringbraut sem birtist þar í dag.
Óli Stefán fagnar þar útskrift sinni en hann kláraði UEFA Pro gráðuna í Noregi á dögunum, æðsta gráða sem þjálfari getur náð sér í. 2018 sagði Óli upp hjá Grindavík til að taka við KA, þar sem hann náði ágætis árangri á fyrstu leiktíð í fyrra.
Óli segir frá atviki sem hann lenti í á leið sinni frá Hornafirði, þar sem fjölskylda hans býr, til Akureyrar. ,,Fljótlega eftir að ég er byrjaður í vinnu og námi lendi ég í því, á leið minni á Akureyri, að keyra inn í snjóflóð í Hvalnesskriðum. Ég fer í það ásamt öllu því fólki sem kom að, að reyna að losa bílinn úr flóðinu þegar annað flóð fellur rétt hjá. Þá átta ég mig á þeirri miklu hættu sem ég var í, því það eru þrjátíu metrar þverhnípt niður í stórgrýtta fjöruna.“
Þetta alvarlega atvik hafði gríðarleg áhrif á heilsu Óla og skrifar hann í pistli sínum á Hringbraut. ,, Þegar ég svo kom norður á Akureyri veiktist ég. Líklegt er að ég hafi orðið fyrir einhverju áfalli eftir snjóflóðið því upp úr þessum veikindum fer ég í það að geta ekki sofið. Á þriðja sólarhring gat ég ekki sofið sem endar með því að ég fæ harkalegt kvíðakast. Ég skildi ekkert hvað var að gerast enda hef ég aldrei upplifað svona áður. Ég átti bókstaflega erfitt með andardrátt svo slæmt var kastið. Öll vandamál heimsins hlóðust upp á sama tíma og ég réði ekki við það.“
Óli er óvirkur alkóhólisti og segist þekkja það að leita sér hjálpar, og leitaði hann hjálpar hjá sálfræðingi eftir að hafa lent í þessu atviki. Hann segir líf þjálfarans ekki dans á rósum, fjölmiðlar og aðrir fylgist vel með og kalli oft eftir því að menn verði reknir úr starfi.
,,Þegar þarna var komið við sögu er að byrja mikill álagstími í vinnu og námi. Vinnan mín er að mörgu leiti….eða öllu leiti ólík öðrum vinnum. Þannig er að ég er háður árangri. Enginn árangur og þá hangir vinnan á bláþræði.“
,,Annað sem gerir mína vinnu ólíka öðrum er að það er fólk bókstaflega í vinnu við það að gagnrýna mig og þá sem eru í minni stöðu. Ef ég geri mistök þá eru þúsundir manna sem lesa um það og hafa álit á því. Jafnvel þrýsta sérfróðir menn og þeirra föruneyti eftir því að ég verði rekinn og missi þar með lifibrauð mitt og fjölskyldu minnar. Því verr sem okkur gengur því dýpri verða stungurnar. Ég er nokkuð viss um að það séu ekki mörg störf sem bjóða upp á þetta. Í skóla væri þetta jafnvel flokkað sem einelti, orð sem ég kannast aðeins of vel við.“