Amanda Jacobsen Andradóttir ung knattspyrnukona frá Íslandi hefur verið búsett í Danmörku frá því á síðasta ári og vakið verðskuldaða athygli. Þessi 16 ára stúlka er ein efnilegasta knattspyrnukona sem Íslendingar hafa átt og er henni lýst sem „16 ára íslensk knattspyrnukona með norskt ríkisfang,“  í umfjöllun norsk fjölmiðils en ljóst er að normenn vilja eigna sér þessa efnilegu stúlku.

Þegar Amanda flutti til Danmerkur á síðasta ári gekk hún til liðs við Fortuna Hjørring en hún samdi á dögunum við FC Nordsjælland hefur nú þegar skorað sitt fyrsta mark í dönsku úrvalsdeildinni.

Faðir Amöndu er fyrrum framherji íslenska landsliðsins, Andri Sigþórsson en móðir hennar er norsk og sökum þess er Amanda með tvöfalt ríkisfang. Amanda hefur spilað fyrir yngri landslið Íslands en norskir fjölmiðlar eru byrjaðir að vekja athygli á því að Amanda gæti spilað fyrir Noreg.

,,Ég er tæknilega mjög góð, ég spila sem sóknarsinnaður miðjumaður í dag. Ég get skapað færi og skotið fyrir utan teig,“ segir Amanda í viðtali við Nfvinner.no sem er norskur miðill sem sérhæfir sig í kvennaknattspyrnu.

Amanda hefur prufað aðrar íþróttir en ástin á fótboltanum togaði alltaf í hana. „Ég prufaði fimleika og dans, það var ekki fyrir mig. Ég hef bara áhuga á fótbolta, ég æfði reglulega með strákum en iðulega með eldri stelpum.“

Vefurinn fjallar svo um það að Amanda geti valið sér landslið komi að þeim tímapunkti á hennar ferli. „Það hefur gengið vel með unglingalandsliði Íslands, ef sá tímapunktur kemur þar sem ég þarf að velja mér landslið þá verður það líklega erfið ákvörðun.“

Norska landsliðið er í tólfta sæti á styrkleikalista FIFA en Ísland situr í nítjánda sæti.