Þróttur R. tók á móti FH í Pepsi Max-deildinni í dag.

Leikurinn var afar mikilvægur fyrir bæði lið því með sigri gátu þau komið sér í betri stöðu í fallbaráttunni. Andrea Mist Pálsdóttir kom FH yfir eftir 11 mínútur og 5 mínútum síðar komst FH í 0-2 eftir sjálfsmark hjá Þrótti. Rétt fyrir hlé fékk Þróttur víti en Mary Alice Vignola klúðraði því og var FH því tveimur mörkum yfir í hálfleik. Í seinni hálfleik náði Morgan Elizabeth Goff að minnka muninn fyrir Þrótt og skömmu síðar náði Vignola að bæta upp fyrir vítið með jöfnunarmarki.

Fleiri mörk voru ekki skoruð og endaði leikurinn því með 2-2 jafntefli. Með þessu varð fallbaráttan í deildinni ennþá meira spennandi þar sem FH er í 7. sæti, þremur stigum frá því neðsta og einu frá fallsæti en Þróttur er í 8. sæti, 2 stigum frá því neðsta og jafnt næst neðsta sætinu að stigum.