Drengurinn frá Darlington, Gary Martin mun yfirgefa ÍBV mistakist félaginu að koma sér aftur upp í efstu deild. Gary Martin og félagar hans í ÍBV berjast um toppsætin í Lengjudeildinni en liðinu hefur fatast flugið síðustu vikur.

Liðið á stórleik við Leikni á heimavelli í kvöld en Gary getur farið frítt frá ÍBV fari liðið ekki upp úr Lengjudeildinni.

„Ég klára feril minn á Íslandi nema eitthvað klikkað komi upp. Við verðum að fara upp í ár og ef við förum ekki upp þá verð ég að öllum líkindum ekki leikmaður ÍBV á næsta ári. Ég vil vera í efstu deild,“ sagði Gary Martin við Jóhann Skúla í Draumaliðinu í dag.

ÍBV situr í þriðja sæti Lengjudeildarinnar en með jafnmörg stig og Keflavík í öðru sætinu. „Markmiðið er að fara upp en það hefur komið upp að ég hugsi um hvort ég þurfi að fara annað. Ég átti von á meiri yfirburðum okkar en raun ber vitni.“

„Ef ÍBV fer upp þá klára ég líklega feril minn með ÍBV en hvað veit maður.“

Gary varð markahæsti leikmaður efstu deildar í fyrra þegar ÍBV féll og hefur skorað 10 mörk í 12 leikjum í ár.