Einn leikur fór fram í 8-liða úrslitum Meistaradeildarinnar í kvöld. Atalanta spilaði við PSG en leikirnir fara nú allir fram í Portúgal vegna kórónuveirunnar. Þá eru einnig aðeins spiluð ein umferð en ekki tvær eins og hefur tíðkast áður.

Atalanta byrjaði leikinn betur og komst yfir um miðjan fyrri hálfleik með marki frá Mario Pašalić. Undir lok leiksins leit út fyrir að Atalanta myndi sigla sigrinum í höfn þar sem PSG virtist ekki ætla að ná að skora. Á 90. mínútu leiksins nær þó varnarmaðurinn Marquinhos að pota boltanum inn fyrir PSG. Virtist vera sem leikurinn myndi þá fara í framlengingu en Eric Maxim Choupo-Moting náði að koma boltanum í net Atalanta í uppbótartíma.

Lokaniðurstaðan því 1-2 fyrir PSG sem er komið í undanúrslit Meistaradeildarinnar.