Emilio Alvarez, fyrrum markmannsþjálfari Manchester United, ásakar David de Gea um að hafa stungið sig í bakið í fyrra.

De Gea krotaði undir nýjan samning við United í september, eitthvað sem Alvarez hafði unnið í fyrir hans hönd og var í sambandi við félagið.

Það var hins vegar ekki Alvarez sem sá um viðræðurnar heldur fékk De Gea annan mann inn á síðustu stundu sem kláraði samningamálin.

Alvarez yfirgaf United í kjölfarið þó að félagið hafi boðið honum nýjan samning.

,,Eftir næstum þrjú ár, mikla vinnu og ófáa fundi með félaginu til að gera hann að launahæsta leikmanni heims þá frétti ég að hann hefði gert þetta án mín,“ sagði Alvarez við AS.

,,Mér leið eins og ég hefði verið stunginn í bakið. Á meðan viðræðurnar voru í gangi þá lenti hann í rifrildum við manninn sem sá um að hann fengi borgað það sem hann fékk borgað.“

,,Á síðustu stundu þá kom einhver annar til sögunnar. Ég sagðist ekki vera hrifinn af því, það var engin tryggð í þessu.“

,,Ég spurði David út í málið og hann sagði ekki neitt, að honum hafi verið sagt að segja engum neitt. Þetta hafði áhrif á mig.“

,,Ég lærði það að þú getur ekki hjálpað einhverjum ef það er ekki fullt traust ykkar á milli og þess vegna yfirgaf ég Manchester United.“