Aron Pálmarsson leikmaður Barcelona tók á sig 70 prósenta launalækkun á meðan útgöngubann er á Spáni. Allir leikmenn Barcelona í öllum íþróttum gerðu það.
Fyrst um sinn voru fréttir af því að fótboltaliðið ætlaði ekki að taka þessu, það var hins vegar rangt.
„Þetta var sett upp fyrir okkur eins og að þetta væri eitthvað val en það var það í raun ekki. Það var annað hvort þetta eða að fara á bætur. Meðallaunin í landinu þarna eru 2.000 evrur þannig að það tóku allir hina leiðina. Þetta var sett á alla leikmenn klúbbsins, og ég fékk einmitt mikið af spurningum með fótboltamennina því þeir voru að semja lengur, eða það kom í fjölmiðlum alla vega. Það var einmitt fyrsta spurning okkar þegar við lásum það; „Bíddu eigum við að taka 70% lækkun en þeir ekki?,“ sagði Aron á Stöð2 Sport í gær.
Lionel Messi og félagar voru aðeins að berjast fyrir því að almennt starfsfólk félagsins, láglaunafólkið myndi halda öllum sínum launum. Fyrst átti að lækka alla um 70 prósent en Messi tókst að afstýra því.
„Liðsstjórinn okkar er æðislegasti gaur sem að þú finnur. Kemur frá Kúbu og læknirinn okkar reddaði honum einhvern veginn í þessa vinnu. Liðsstjórar eru „já og amen“-gæjar en þessi er bara besti maður sem að þú finnur. Hann átti að lækka um 70% en fótboltinn græjaði það að svo yrði ekki.“