Ryan Giggs, þjálfari Wales hefur greint frá því að UEFA stefni á það að spila Þjóðadeildina í september og október í ár. Þá yrðu spilaðir þrír landsleikir í einum glugga en ekki tveir eins og venjan er.
Er þetta gert til að koma fyrir umspili Íslands og fleiri liða um laust sæti á EM, fyrir í nóvember á þessu ári.
Umspil Íslands átti fyrst um sinn að fara fram í mars og svo í júní, það verður ekki vegna kórónuveirunnar. Ísland er í riðli með Englandi, Belgíu og Danmörku í Þjóðadeildinni.
Ísland á að mæta Rúmeníu um laust sæti á EM og svo Búlgaríu eða Ungverjalandi í úrslitum laust sæti.
,,Ég verð bara að undirbúa mig ár fram í tímann, núna er það september þar sem Þjóðadeildin er,“ sagði Giggs.
,,Við búumst við því að spila í september og þá verða það þrír leikir, frekar en tveir. UEFA hefur sett það þannig upp, það er vegna umspils sem er eftir. Það er stefnt á að hafa það í nóvember.“
,,Við getum ekki beðið eftir því að fara af stað aftur eins og allir aðrir.“