,,Fyrir tíu árum var óreiða í heimi íþrótta vegna ösku frá Íslandi,“ segir í frétt Daily Mail í dag, þar er rifjað upp að tíu ár séu frá því að Eyjafjallajökull fór að gjósa hér á landi. Gosið á Íslandi hafði áhrif um alla Evrópu, aska úr gosinu fór víða um, með þeim afleiðingum en meira en 100 þúsund flugferðum var aflýst.

Askan var fíngerð og hafði þau áhrif að flugvélar gátu ekki farið á loft, það var talið hættulegt að fljúga. Þetta hafði áhrif á flugumferð á Englandi í tæpan mánuð.

Mörg íþróttafélög voru í vandræðum  með að komast á áfangastað, Barcelona þurfti sem dæmi að ferðast þúsund kílómetra með rútu frá Barcelona til Mílanó, til að mæta Inter. Börsungar töpuðu 3-1, 14 klukkustunda rútuferðalag fór ekki vel í Lionel Messi og félaga.

Liverpool þurfti að ferðast í 24 klukkutíma til Madríd og tapa þar fyrir Atletico Madrid í Evrópudeildinni. Sam Allardyce gat ekki farið og hitt Robert Lewandowski til að sannfæra hann um að koma til Blackburn, kaup sem hefðu breytt miklu fyrir Blackburn.

Daily Mail rifjar svo upp að þetta öskuský hafi hafi komið á sama tíma og Björgólfur Guðmundsson og Eggert Magnússon voru að selja West Ham. Þeir félagar höfðu vakið mikla athygli eftir kaup sín á félaginu, fjármálahrunið um allan heim hafði áhrif á þeirra áætlanir með félagið.

,,Eftir að hafa farið í gegnum fjármálhrunið ári áður, þá var eldgosið síðasta stráið. Björgólfur afhenti David Sullivan og David Gold völdin af félaginu í maí. Eftir þetta öskuský þá létu Eggert og félagar sig hverfa,“ segir í frétt Daily Mail.