Tímavélin:
Ron Atkinson er nafn sem margir knattspyrnuaðdáendur kannast við en hann er fyrrum knattspyrnustjóri Manchester United.
Atkinson þjálfaði lið United frá 1981 til 1986 áður en hinn goðsagnarkenndi Sir Alex Ferguson tók við.
Atkinson fæddist árið 1939 í Liverpool borg en hann þjálfaði fleri lið á ferlinum og má nefna West Bromwich Albion, Atletico Madrid, Aston Villa og Nottingham Forest.
Eftir að hafa lagt þjálfarabókina á hilluna reyndi Atkinson fyrir sér í sjónvarpi og starfaði fyrir stöðina ITV Sport.
Hann sá um að fjalla um knattspyrnuleiki og lýsti leikjum í beinni útsendingu ásamt Clive Tyldesley og þóttu þeir ná vel saman.
Árið 2004 komst Atkinson svo í fréttirnar er hann lýsti leik Chelsea og Monaco í Meistaradeild Evrópu.
Atkinson var ekki hrifinn af frammistöðu og líkamstjáningu varnarmannsins Marcel Desailly í leiknum en hann lék með Chelsea og var um tíma fyrirliði liðsins.
,,Hann, Desailly er það sem er þekkt í skólum landsins sem latur og þykkur negri,“ sagði Atkinson í beinni útsendingu.
Að vonum fengu þessi ummæli gríðarlega hörð viðbrögð og stuttu seinna hafði Atkinson sagt af sér.
Margir segja að honum hafi tekist að eyðileggja eigið orðspor með hegðun sinni utan vallar en sama ár sagði hann óviðeigandi hluti um Kínverja fyrir utan Hillsborough völlinn.
,,Kínverjarnir eru með bestu óléttuvörn heims – ég skil ekki af hverju þeir eru svona margir því konurnar þarna eru svo ljótar,“ voru ummælin sem Atkinson lét falla.
Carlton Palmer, fyrrum leikmaður Atkinson hjá Sheffield Wednesday, kom þó vini sínum til varnar og þvertók fyrir það að hann væri kynþáttahatari.
,,Ég er svartur og ég sit hérna og mun verja heiður Big Ron. Ekki bara því hann er vinur minn því ég veit einnig hvernig manneskja hann er,“ sagði Palmer.
,,Ef við ætlum að taka á kynþáttahatri þá skulum við horfa á mikilvægari hluti en þetta, ekki ummæli sem voru ekki meint á þann hátt.“
Atkinson sagðist sjálfur mikið sjá eftir þessum ummælum en í þættinum Celebrity Big Brother árið 2013 lét hann önnur rasísk ummæli falla um múslima.
,,Til þeirra sem ég móðgaði og þá sérstaklega Marcel Desailly, ég biðst afsökunar á þessum ummælum,“ sagði Atkinson eftir uppsagnarbréfið árið 2004.
,,Þetta var ekki gert viljandi en það er leiðinlegt að ég hafi látið þetta út úr mér. Ég vissi ekki einu sinni hvað ég hafði sagt.“
,,Ég hef unnið með fleiri svörtum leikmönnum en nokkur annar þjálfari í heiminum og tel mig geta fullyrt það að enginn hafi heyrt mig segja þessa hluti áður.“
Orðspor Atkinson skemmdist þó töluvert eftir þetta umdeilda ár og er oft deilt um hvort hann hafi verið rasisti, eða ekki.
