Paul Merson, goðsögn Arsenal, segir að félagið verði í veseni með að framlengja við Pierre Emerick Aubameyang vegna liðsfélaga hans, Mesut Özil.
Aubameyang verður samningslaus næsta sumar en hann hefur enn ekki skrifað undir nýjan samning.
Merson kennir Özil um það en hann er lang launahæsti leikmaður Arsenal og fær í kringum 350 þúsund pund á viku.
,,Það væri mikið áfall fyrir Arsenal að missa Aubameyang, hins vegar þá verður þetta ákvörðun félagsins hvað þeir ákveða að gera,“ sagði Merson.
,,Gefa þeir honum 300 þúsund pund á viku? Ég hef alltaf sagt að það verði vesen alveg þar til Mesut Özil yfirgefur félagið.“
,,Hann er þarna alla daga og allir aðrir toppleikmenn vilja fá það sem hann fær. Það er risastórt vandamál og ekki nýtt vandamál.“
