Hjörvar Hafliðason, sérfræðingur Dr. Football segir að ólga hafa verið í Breiðablik þegar æfingaferð félagsins var í Svíþjóð, það er hins vegar búið að lægja öldurnar samkvæmt því sem kom fram í þætti dagsins.

Sagt var að leikmenn Breiðabliks hefðu verið ósáttir með það að nýr þjálfari liðsins, Óskar Hrafn Þorvaldsson hefði ekki ferðast með liðinu heim. ,,Það var æfingaferðin sem var farin, ég hef fengið þetta sent úr mörgum áttum. Þjálfarinn ferðaðist ekki heim með liðinu, hann fór til Danmerkur þar sem fjölskylda hans býr,“ sagði Hjörvar í þætti dagsins.

Sagt var að leikmenn hefðu fundað með stjórn félagsins vegna málsins. ,,Það eru auðvitað sigurvegarar í liðinu í Gaua Lýðs og Arnari Sveini, þeir eru að búa til hugarfar sigurvegarans. Þeir heimtuðu fund með stjórninni, þetta gerðist. Ég hef fengið þetta staðfest.“

Orri Steinn Óskarsson, sonur Óskars samdi við FCK í Danmörku á dögunum og býr þar nú ásamt móður sinni.

Hrafnkell Freyr Ágústsson, sérfræðingur úr unglingastarfi Hjörvars segir að agareglur þegar leikmenn kíktu út á lífið, hafi ekki farið vel í leikmenn. ,,Þeir fá að kíkja út daginn áður en þeir fara heim, þeim er sagt að haga sér. Hvað annað gerir þú í Svíþjóð? Það fór illa í mannskapinn og svo frétta þeir að Óskar hafi farið til Köben, þá fýkur meira í menn.“

Kristján Óli Sigurðsson, sagði þetta var væl í leikmönnum Breiðabliks. ,,Leikmenn geta drullast til að vinna einhverja fótboltaleiki, og eiga að hætta að rífa kjaft. Væl af síðustu sort.“

Hjörvar segir að Óskar sé að koma úr Gróttu, það sé öðruvísi en að stýra Blikum. ,,Óskar er bara að læra, hann er að koma úr Gróttu. Langt síðan að hann var í stórum klúbbi, þetta var leyst og það er ágætt að það sé sagt frá þessu.“

Þátt dagsins má sjá hér að neðan.