Íslenskt VAR kerfi er að verða fullklárað en fyrirtækið OZ hefur hannað kerfið undanfarið, það er Vilhjálmur Alvar Þórarinsson dómari sem hefur leitt þá vinnu. Fréttablaðið segir frá.

VAR er að verða stór hluti af fótboltanum, margir þola ekki þessa myndbandsdómgæslu en hún er kominn til að vera. Kerfið sem er notað á Englandi er of dýrt fyrir knattsyrnusambönd eins og KSÍ.

Því hefur OZ verið að hanna kerfi sem er minna í sniðum en þeir vonast til að það nái því sama fram.

„Verði það samþykkt getur hver sem er tekið þetta upp. Við teljum okkur vera með lausn sem er aðgengileg fyrir flest knattspyrnusambönd, stór sem smá. Við erum að þróa þetta þannig að það þarf ekki jafn mikinn tilkostnað við að koma þessu á laggirnar. Það er í raun hægt að hafa VAR-miðstöðina hvar sem er. Í dag er þetta þannig á Englandi að miðstöðin er í Stockley Park. Þá hafa þeir ljósleiðara inn og fá merki frá öllum völlum inn í þá miðstöð,“ sagði Vilhjálmur Alvar við Fréttablaðið.

Vilhjálmur heldur til Hollands á næstu dögum þar sem hann kynnir kerfið fyrir FIFA sem er með VAR vinnustofu í Hollandi.