Áslaug Munda Gunnlaugsdóttir og Sveindís Jane Jónsdóttir, leikmenn meistaraflokks Breiðabliks, eru nýkomnar heim eftir að hafa æft með aðalliði Paris Saint-Germain. Þær voru við æfingar hjá franska stórliðinu dagana 9.-13. febrúar síðastliðinn.
Parísarliðið sló Breiðablik út úr Meistaradeild Evrópu í haust og spilar í 8 liða úrslitum gegn Arsenal 25. mars og 1. apríl.
Liðið situr nú í 2. sæti frönsku úrvalsdeildarinnar 3 stigum á eftir Lyon. PSG er eitt af stórliðum Evrópu en félagið hefur tvisvar sinnum komist í úrslitaleik Meistaradeildar Evrópu.
Með í för var Úlfar Hinriksson yfirmaður afreksþjálfunar hjá Breiðablik sem fylgdist með æfingum og kynnti sér starf PSG á meðan stelpurnar æfðu af kappi.
Stelpurnar fengu gott tækifæri til að máta sig við margar af bestu leikmönnum heims en í liðinu eru 17 landsliðskonur þar á meðal hin danska Nadia Nadim og Formiga frá Brasilíu.
