Hræðilegt ástand á Old Trafford, heimavelli Manchester United er ein ástæða þess að fáir hafa áhuga á að reyna að kaupa Manchester United. Þetta segja ensk blöð.

Rætt er við fjársýslumann sem segir hræðilegt ástand á vellinum stóra ástæðu þess, sagt er að það kosti 200 milljónir punda til að endurbæta Old Trafford.

Glazer fjölskyldan sem á United í dag er sögð hafa dregið lappirnar í að halda þessum stærsta heimavelli enska fótboltans, í góðu ástandi. Stúkur eru farnar að leka.

Glazer fjölskyldan er sagð skoða það að selja félagið en verðmiðinn yrði um 2,4 milljarður punda. Fjársýslumaðurinn segir aðeins 20 einstaklinga í heiminum geta rifið fram slíka upphæð, líklegast væri að slíkur einstaklingur kæmi frá Mið-Austurlöndum.

Glazer fjölskyldan er í rekstri víða um heim en gríðarlegur hagnaður United hefur síðustu ár greitt fyrir tap í öðrum rekstri fjölskyldunnar.

Óhætt er að segja að stuðningsmenn United hafi fyrir löngu fengið nóg af fjölskyldunni sem hefur tekið gríðarlega fjármuni úr félaginu.