Guðmundur Benediktsson, einn skemmtilegasti knattspyrnumaður sem Ísland hefur átt rifjar upp feril sinn í Draumaliðinu, hlaðvarpsþætti sem Jóhann Skúli stýrir. Þar fer hann yfir bestu leikmennina sem hann lék með á ferlinum.

Einn sem Guðmundur nefnir til sögunnar er Mihajlo Bibercic, sem lék hér á landi frá 1993 til ársins 2004. Hann gerði garðinn frægan með ÍA áður en hann hélt í KR árið 1995, þar var Guðmundur leikmaður KR.

Óhætt er að segja að Bibercic hafi mætt úr fríi sínu í Serbíu með væna vömb, eitthvað sem hann þurfti að taka af sér.

,,Hann spilaði með mér í KR 95, þegar Mikki kom í fyrsta skipti. Fyrsta æfingin var á sandgrasinu í Kópavogi, hann var í ÍA árið á undan. Hann kemur til KR í febrúar eða mars, hann hafði verið í fríi og hafði haft það býsna gott,“ sagði Guðmundur þegar hann rifjar upp komu Mikka, eins og hann var kallaður.

Mikki var ekki í fyrsta sinn að glíma við auka kíló, hann hafði sína leið til að rífa þau af sér. Leið sem fáir hafa leikið eftir.

,,Við erum með klefa þarna, hann klæðir sig í fjóra regnjakka. Það var hans trix til að æfa í gufubaði, hann æfði svona í fleiri, fleiri vikur. Hvort þetta virkaði, ég er ekki sannfærður um það.“

Guðmundur var ekki sanfærður en bumban fór að hverfa og Mikki komst í form. ,,Hann komst í betra og betra form, það var mjög gaman að spila með Mikka. Líflegur karakter,“ sagði Guðmundur þegar hann rifjaði upp dvöl Bibercic í KR.