Roberto Firmino framherji Liverpool hefur verið frábær í ár, hann sér til þess að Sadio Mane og Mo Salah blómstri.

Eftir þessu hefur verið tekið og Firmino fengið mikið lof fyrir frammistöðu sína.

Framherjinn frá Brasilíu lék áður með Hoffenheim í Þýskalandi og hann er nú í dag orðaður við endurkomu þangað.

Ensk götublöð segja að FC Bayern hafi áhuga á að fá Firmino í sumar, sagt er að félagið skoði að gera 75 milljóna punda tilboð í framherjann.

Ekki er líklegt að Liverpool taki slíku tilboði en Firmino og Leroy Sane eru sagðir efstir á óskalista Bayern í sumar.