Mikel Arteta, stjóri Arsenal er á því að hreinsa þurfi hressilega úr leikmannahópi félagsins í sumar til að geta farið að byggja upp gott lið.
Ensk blöð fjalla um málið og segja að stjörnur liðsins verði settar á sölu í sumar, Pierre-Emerick Aubameyang, Mesut Ozil og Alexandre Lacazette gætu allir farið.
Aubameyang og Özil munu aðeins eiga ár eftir af samningi sínum, það gæti hentað félaginu vel að losna við tvo af sínum launahæstu leikmönnum. Það gæfi Arteta svigrúm til að sækja þá leikmenn sem hann treystir á til framtíðar.
Arteta ku vita að ef Arsenal kemst ekki í Meistaradeildina, þá þarf hann að losa marga til að geta fengið inn menn.
Shkodran Mustafi, David Luiz og Sokratis eru allir nefndir til sögunnar hjá Mirror en þar kemur fram að Arteta vilji styrkja varnarlínuna og miðsvæði sitt.
