Markvörðurinn Guðjón Orri Sigurjónsson hefur gert tveggja ára samning við Íslandsmeistara KR í Pepsi Max-deild karla.
Þetta staðfesti félagið í dag en Guðjón verður væntanlega varamarkvörður KR-inga á næstu leiktíð.
Guðjón hefur síðustu tvö ár leikið með Stjörnunni og var þar varamarkvörður fyrir Harald Björnsson.
Tilkynning KR:
Guðjón Orri Sigurjónsson hefur samið við KR til tveggja ára. Samningurinn gildir út keppnistímabilið 2021. Guðjón kemur frá Stjörnunni þar sem hann lék sl. tvö ár.
Við náðum tali af Guðjóni þar sem hann segist vera gríðarlega ánægður með vistaskiptin og hann hlakki mikið til komandi tíma hjá KR.
Rúnar Kristins hafði þetta um Guðjón að segja: Við KR ingar erum gríðarlega ánægðir með að fá þennan reynslumikla markmann til félagsins. Guðjón mun styrkja okkar góða hóp fyrir komandi sumar og hlökkum við til að vinna með honum í KR.
Við óskum Guðjóni góðs gengis hjá okkur KR ingum.
