Ólafur Garðarsson, er reynslumikill umboðsmaður knattspyrnumanna. Hann hefur lengi starfað en er þó ekki jafn áberandi og á árum áður.
Ólafur leggur til breytingar á Íslandsmótinu í fótbolta svo að leikurinn hér heima veðri betri. Ólafur fór ítarlega yfir málið á Rás2 í gær.
„Góður leikmaður hér heima í dag getur haft fín laun og hann getur unnið með. Hann getur unnið kannski 70% vinnu með. Ef þú leggur það saman er hann kannski með betri laun en það sem þú færð í byrjendasamning á Norðurlöndunum. Fótboltinn á Norðurlöndunum er hins vegar miklu betri en hann er hérna heima. Nú verða kannski einhverjir súrir en við sáum Molde – KR. Ég talaði við Milos [Milojevic, þjálfara] í gær og hann segir að hraðinn sé mun meiri í Superettan (1. deildinni) í Svíþjóð en hér heima. Síðan er það ennþá meira í Noregi og ennþá meira í Allsvenskan. Þetta er bara staðreyndin,“ sagði Ólafur á Rás2
Ólafur hefur lengi verið í faginu, hann segir líkamlegt atgervi leikmanna hér heima oft ábótavant.
,,Ég sendi menn til reynslu á haustin sem eiga vera í toppformi og ég fæ stundum símtal til baka: „Er hann búinn að vera meiddur eða veikur?“ og ég segi nei, af hverju? „Af því að það er hálfleikur í leiknum sem hann er að spila og hann er búinn“. Nú er ég ekki að áfellast þjálfara, þetta er svolítið vandmeðfarið, tímabilið er svo stutt hérna. Það eru fullt af leikjum og þjálfarar eru svolítið að ofkeyra leikmenn og ofgera þeim. En nýr yfirmaður knattspyrnumála Arnar [Þór Viðarsson] hefur verið að benda á margt sem betur má fara. Bæði það að það er ekki nóg „tempó“ á æfingum og leikirnir á yngri flokkunum eru kannski ekki nógu langir,“ segir Ólafur
Hann leggur til breytingar á Íslandsmótinu, til að gæðin hér heima og styrkleikinn verði meiri.
„Ég held við verðum að taka stórar ákvarðanir ef við ætlum að bæta deildina. Það gengur ekki að hafa fjögurra og hálfs mánaða mót og sjö og hálfan mánuð í undirbúningstímabil. Það gengur aldrei. Annað hvort þurfum við að gefa undirbúningsmótunum vægi, með Evrópusæti eða einhverju slíku, eða til dæmis fækka liðunum í tíu og hafa þrefalda umferð. Einn möguleikinn er að liðin öll samþykki það að fyrstu sex umferðirnar fari fram innandyra, kannski alltaf á sama stað, í Egilshöllinni. Ef það er lið frá Akureyri að þá yrði bara borgað undir liðið. Við verðum að taka einhverjar svona ákvarðanir.“