Hlaðvarpsþátturinn, 90 mínútur heldur áfram á fullu fjöri en um er að ræða þátt sem Hörður Snævar Jónsson, ritstjóri 433.is stýrir.

Þátturinn hefur notið mikilla vinsælda en afar áhugaverðir gestir hafa komið í þáttinn.

Gestur þáttarins að þessu sinni er Skúli Jón Friðgeirsson sem hefur leikið sinn síðasta leik á ferlinum, aðeins 31 árs gamall.

Skúli ræddi erfið meiðsli í þættinum en hann varð fyrir slæmum höfuðmeiðslum fyrr á þessu ári.

Skúli náði að jafna sig alveg af þessum meiðslun og tókst að klára tímabilið með KR sem vann Íslandsmeistaratitilinn.

,,Það er í lok mars sem þetta gerist. Ég tók þá ákvörðun síðasta haust að þetta yrði síðasta tímabilið mitt,“ sagði Skúli.

,,Eftir síðasta tímabil þá sest ég niður með Rúnari og segi það að ég væri búinn að ákveða að fara í skóla næsta haust og þetta væri síðasta tímabilið.“

,,Ég sagðist ætla að gera allt sem ég gæti til að gera þetta tímabil eins og gott og hægt væri þannig ég æfði mjög vel í vetur og var í fínu standi fyrir mót þar til að þetta gerist mánuði fyrir mót og allt fer í klessu.“

,,Þetta tímabil lítur út fyrir að vera búið og þar með ferillinn og síðan allt sem kemur ofan á það að vera í höfuðmeiðslum.“

Skúli viðurkennir að þetta hafi tekið á andlega og byrjaði að hugsa um allt annað en fótbolta.

,,Þú ferð að hugsa um annað en fótboltann og hugsar um hvort að þú verðir í þessu veseni allt þitt líf að vera með höfuðverki og að geta ekki hreyft þig og allt þetta.“

,,Þetta var mjög erfitt og ég var búinn að segja það um daginn að þegar kemur að því að ég sé að þetta er að ganga og ég get byrjað að æfa aftur þá var það rosalegur léttir fyrir mig andlega, bæði því ég vissi að ég fengi að klára ferilinn á vellinum og svo allt annað. Að þurfa ekki að díla við þetta allt saman í líf og starfi.“