Hlaðvarpsþátturinn, 90 mínútur heldur áfram á fullu fjöri en um er að ræða þátt sem Hörður Snævar Jónsson, ritstjóri 433.is stýrir.
Þátturinn hefur notið mikilla vinsælda en afar áhugaverðir gestir hafa komið í þáttinn.
Gestur þáttarins að þessu sinni er Óskar Örn Hauksson sem er einn allra besti leikmaður í sögu efstu deildar á Íslandi, hann hefur leikið með KR í 12 ár og varð Íslandsmeistari með liðinu á mánudag.
Við fengum Óskar til að ræða athyglisverða tíma tímabilið árið 2006 og 2007 þegar Teitur Þórðarson tók við liðinu.
Teitur hafði lengi verið að þjálfa erlendis áður en hann ákvað að taka boði KR um að snúa aftur heim.
Það var gríðarleg harka á æfingum eftir að Skagamaðurinn tók við og hefur Óskar aldrei kynnst öðru eins.
,,Þetta var bara dæmi sem var ekki að ganga upp. Ég kem seinna árið hans og þá var þetta aðeins búið að mildast,“ sagði Óskar.
,,Það voru útihlaup, vakna sjö á morgnanna og lyfta og hlaupa og allt það. Svolítið gamaldags ef hægt er að segja það.“
,,Við vorum með tiltölulega gamalt lið og menn í skóla og vinnum með fjölskyldur. Þetta var bara of mikið.“
,,Menn voru búnir á því þegar mótið byrjaði. Það sýndi sig, við vorum í brasi allt það tímabil.“
Óskar segir svo að hann hafi aldrei upplifað eins tíma á ferlinum.
,,Nei. Hann var lengi frá Íslandi og ætlaði að taka þetta alveg með trukki og allt það en þetta var bara ekki rétt nálgun.“