Rúnar Már Sigurjónsson, miðjumaður FC Astana verður í eldlínunni þegar lið hans mætir Manchester United, í Evrópudeildinni á morgun. Rúnar ólst upp sem glerharður stuðningsmaður United.
,,Ég sá bara Manchester United og hugsaði ´Vá´,“ sagði Rúnar um málið í samtali við The Athletic.
Rúnar sem er fæddur árið 1990 gekk í raðir Astana í sumar og hefur reynst liðinu frábærlega. ,,Ég sá ekki hvaða önnur lið voru í riðlinum fyrr en klukkutímum síðar,“ sagði Rúnar en hann var á leið í flug þegar dregið var.
,,Ég sat einn í flugvélinni, hugsaði bara um United en gat ekki talað við neinn. Ég lenti svo, sá hvaða önnur lið voru með okkur. Það kviknaði í símanum mínum, af skilaboðum frá vinum.“
,,Það vita allir hvaða lið ég styð og flestir af mínum vinum styðja líka United,“ sagði Rúnar en það sannast svo í Twitter færslu sem Tómas Þór Þórðarson, birtir.
,,Þetta er heimsviðburður í Skagafirði. Er að fljúga til Manchester (ekki að fara á leikinn þó) og með mér er ca. helmingurinn af 34 manna fjölskylduhópi Rúnars sem er á leið á leikinn. Allt rammhart United-fólk. Sá fær stuðning annað kvöld,“ skrifar Tómas á Twitter.
Þetta er heimsviðburður í Skagafirði. Er að fljúga til Manchester (ekki að fara á leikinn þó) og með mér er ca. helmingurinn af 34 manna fjölskylduhópi Rúnars sem er á leið á leikinn. Allt rammhart United-fólk. Sá fær stuðning annað kvöld. https://t.co/GSuF4h1DMN
— Tómas Þór Þórðarson (@tomthordarson) September 18, 2019
