Kári Árnason er mættur aftur heim í Pepsi Max-deildina en hann spilaði með Víkingum gegn FH í kvöld.
Eitt mark var skorað í Kaplakrika en Brandur Olsen gerði það fyrir FH beint úr aukaspyrnu.
Kári var sáttur með spilamennsku liðsins en segir að aukaspyrnudómurinn hafi verið glórulaus.
,,Þetta var í lagi fyrir utan kannski fyrstu tvær mínúturnar, manni leið bara vel á vellinum,“ sagði Kári við Stöð 2 Sport.
,,Við áttum þennan leik með húð og hári og áttum skilið meira en við nýtum ekki færin og þá gerist svona.“
,,Lokasendingin var ekki nógu nákvæm og endar í fanginu á markmanninum frekar en í löppunum á okkur. Þetta var ósanngjarnt, við áttum ekki að tapa þessum leik.“
,,Ég held að enginn hafi verið ánægður með þessa aukaspyrnu. Júlli nær boltanum og svo sparkar hann eitthvað í hann og dómarinn heyrir eitthvað hljóð og ákveður að dæma aukaspyrnu, þetta var glórulaust.“
