Pepsi Max-Mörkin á Stöð2 Sport voru með besta móti í gær, líflegar umræður voru í þættinum. Arnar Gunnlaugsson, þjálfari Víkings fékk meðal annars á baukinn, frá Þorkeli Mána Péturssyni, sérfræðingi þáttarins.

Arnar gagnrýndi ástandið á grasinu hjá Grindavík eftir markalaust jafntefli liðsins á laugardag. „Þessi grasmenning er svo þreytandi. Ef við ætlum að hafa gras höfum það þá bara almennilegt. Ég elska fótboltann það mikið að ég veit að leikirnir á verri völlunum verða bara hægir og leiðinlegir og endar með því að enginn nennir að koma að horfa á þetta,“ sagði Arnar við Pepsi Max-Mörkin.

Máni var afar óhress með þessi ummæli Arnars og sagði að lið sem spilar heimaleiki sína á gervigrasinu í Laugardal, geti ekki gagnrýnt aðra velli. Víkingar eru að bíða eftir því að heimavöllur þeirra í Víkinni verði klár. Þar er verið að leggja nýtt gervigras.

„Þetta er eins og að fara með gröfu á glerhýsi. Víkingarnir eru að bjóða upp á heimavöll í Laugardalnum eins og er. Þeir sem hafa séð gervigrasið þar vita hvað ég er að tala um,“ sagði Máni í Pepsi Max-Mörkunum.

„Þetta er bara ósmekklegt. Það er verið að reyna að halda úti grasvelli þarna og þetta er bull hjá Arnari. Það er búið að skora fullt af mörkum á grasvöllunum sem hann talar um. Ég sé ekki að boltinn sé verri á grasi en gervigrasi.“

Umræðuna má sjá hér að neðan.