Boltinn heldur áfram að rúlla í Mjólkurbikar karla og í kvöld fer fram fyrsti leikurinn í 8 liða úrslitum, en þá eigast við ÍBV og Víkingur R. Liðin hafa mæst fjórum sinnum áður í Bikarkeppni KSÍ. ÍBV hefur unnið þrjá leiki, en Víkingur einn. Fyrsta viðureignin var á malarvellinum í Löngulág í Vestmannaeyjum, þar sem ÍBV vann 4-1 sigur í 8-liða úslitum. ÍBV fór alla leið í bikarnum það árið og hampaði bikarmeistaratitlinum eftir 2-0 sigur á FH í úrslitaleik á Melavellinum í Reykjavík.

Þegar ÍBV og Víkingur áttust við í 16-liða úrslitum Mjólkurbikarsins árið 1992 fóru fimm gul spjöld á loft og var jafnt 2-2 eftir venjulegan leiktíma, en Víkingur vann 3-2 eftir æsispennandi framlengingu. Liðin mættust að nýju 17 árum síðar, í 32-liða úrslitum árið 2009, og þá voru úrslitin einnig 3-2, en að þessu sinni voru það Eyjamenn sem fóru með sigur af hólmi þar sem Viðar Örn Kjartansson skoraði sigurmarkið í uppbótartíma.

ÍBV vann Víking svo aftur þegar liðin mættust í 8-liða úrslitum í bikarnum 2017 í fjörugum leik og niðurstaðan 2-1 sigur ÍBV. Líkt og 1972 fór ÍBV alla leið og fagnaði enn einum bikartitlinum eftir 1-0 sigur gegn FH, eins og 1972, í úrslitaleiknum á Laugardalsvelli. Liðin mætast á Hásteinsvelli í Eyjum kl. 18:00 í dag, miðvikudag, og er fólk hvatt til að fjölmenna á völlinn og drekka í sig stemninguna. Þau sem ekki komast á leikinn geta fylgst með í beinni útsendingu á Stöð 2 sport.

Það vakti talsverða athygli hvaða bát Víkingar fóru með til Eyja, en þeir fóru með lítilli tryllu frá Landeyjahöfn en ekki Herjólfi.

Myndir af þessu má sjá hér að neðan.

Þetta er að hafast #fotboltinet @vikingurfc pic.twitter.com/KnhCzcQtS5

— Haraldur Haraldsson (@HarHaralds) June 26, 2019

Mjólkurbikarinn #fotboltinet #eyjar @vikingurfc @footballiceland pic.twitter.com/vYxHA9yBcu

— Haraldur Haraldsson (@HarHaralds) June 26, 2019