Aron Jóhannsson, verður samningslaus 1 júlí. Þá er samningur hans við þýska stórliðið, Werder Bremen á enda. Hann fær ekki nýjan samning þar.
Aron skoðar nú hvað sé rétt skref fyrir feril hans, Aron er 28 ára gamall en hefur glímt við erfið meiðsli síðustu ár.
„Mikilvægast fyrir mig er að finna gott lið þar sem ég er metinn mikils. Ég þarf að finna hamingjuna aftur í því að spila fótbolta,“ sagði framherjinn knái í samtali við Morgunblaðið.
Aron kveðst vera með talsvert magn af tilboðum á borði sínu en skoðar hvaða skref henti sér best.
„Eins og staðan er í dag þá get ég eiginlega ekki sagt til um hvað muni gerast. Það er mikill áhugi á mér frá ýmsum löndum en ég bíð bara eftir því að rétta félagið og rétta tækifærið komi. Að allt smelli svo ég geti í rauninni endurræst ferilinn eftir erfitt tímabil. Ég er ekki nema 28 ára og er að fara inn í það sem er talað um að séu bestu árin á fótboltaferlinum.“