Erik Hamren, landsliðsþjálfari, var gríðarlega ánægður með leikmennina í kvöld eftir sigur á Tyrkjum.

Ísland hafði betur 2-1 á Laugardalsvelli í mikilvægum leik í undankeppni EM.

Hamren ræddi við RÚV eftir leikinn og segist vera mjög stoltur af sínum mönnum og þeirra frammistöðu.

,,Ég er svo ánægður og stoltur. Við spiluðum virkilega góðan leik og þá sérstaklega í fyrri hálfleik,“ sagði Hamren við RÚV.

,,Í fyrri hálfleik átti staðan að vera 3-0 en svo skora þeir og það var eins og að fá högg í andlitið.“

,,Við héldum samt áfram og unnum virkilega vel saman sem lið. Við spiluðum klókt í seinni hálfleik. Við vildum fá þessi sex stig og nú stöndum við hér með þessi sex stig.“

,,Það er svo mikilvægt að vinna heimaleikina. Nú erum við með níu stig líkt og Tyrkland og ég býst við að Frakkland hafi unnið Andorra.“

,,Nú erum við í góðri stöðu fyrir haustið en ég er mjög ánægður og stoltur af leikmönnunum .“