Það er öllum ljóst að veðmál á íslenskan fótbolta hafi aukist ár frá ári, undanfarið. Hægt er að veðja á leiki í öllum deildarkeppnum á Íslandi og í 2 flokki. Fjallað er um þetta í Morgunblaðinu í dag.
Um er að ræða erlenda veðbanka í flestum tilfellum, upplýsingar sem þeir hafa ekki nýtast oft íslenskum aðilum, sem eru að veðja á leiki. Þannig geta aðilar hér heima vitað byrjunarlið löngu fyrir leiki og mögulega vitað hvaða leikmenn eru meiddir, og þar fram eftir götunum.
„Við lítum á þetta sem stórt vandamál,“ segir Þorvaldur Ingimundarson, heilindafulltrúi Knattspyrnusambands Íslands (KSÍ) við Morgunblaðið.
„Um leið og einhverjir 20 aðilar hafa allt í einu gríðarlegan áhuga á einhverjum leik í Faxaflóamóti annars flokks, þá skýtur það skökku við. Það er ekkert endilega verið að hagræða úrslitum en þarna liggja einhvers staðar upplýsingar sem aðrir hafa ekki,“ segir Þorvaldur.
Oft hafa ungir krakkar lent í því að menn sem hafa áhuga á að veðja á leiki, eru að senda þeim skilaboð. Það getur verið leikur í 2 flokki þar sem það hefur gríðarleg áhrif, ef það vantar besta manninn eða eitthvað í þeim dúr.
„Þetta gerist mikið í öðrum flokki, þar sem ekki er alltaf ljóst hvaða leikmenn verða með í hvert skipti. Það getur munað miklu,“ segir Þorvaldur.
„Ég veit af dæmum frá því í hittifyrra þegar þjálfarar voru hættir að tilkynna byrjunarlið í öðrum flokki á æfingu daginn fyrir leik eins og venjan hafði verið. Þeir völdu að gera það frekar inni í klefa 45 mínútum fyrir leik, af því að það var svo mikið áreiti á leikmenn fyrir leikina að gefa upp hverjir myndu spila,“ segir Þorvaldur.
„Við erum ekki á móti veðmálastarfsemi sem slíkri heldur höfum við verið að beina athygli leikmanna að því hve stutt er í raun á milli þess að veita upplýsingar og þess að hagræða úrslitum.“