ÍA vann frábæran sigur í Pepsi Max-deild karla í kvöld er liðið fékk FH í heimsókn á Akranes.

Skagamenn lentu í litlum vandræðum gegn stórveldinu í kvöld og höfðu að lokum betur, 2-0.

Bjarki Steinn Bjarkason var frábær í leik kvöldsins og skoraði hann tvennu í sigrinum.

Hér má sjá það góða og slæma úr leiknum.

Plús:

Ég hef sagt það áður og ég segi það aftur, Skagamenn eru til alls líklegir í sumar og er Jóhannes Karl Guðjónsson er að gera frábæra hluti.

Jóhannes virkar mjög góður þjálfari og gæti hann mögulega verið næsti Íslendingurinn til að reyna fyrir sér erlendis.

Bjarki Steinn Bjarkason gerði tvennu fyrir ÍA og var hann frábær fyrir liðið. Bæði mörkin voru virkilega falleg.

Skagamenn voru mun minna með boltann í kvöld en það hentaði þeim svo vel. Fyrra markið kom eftir magnaða skyndisókn.

Mínus:

Mig langar að líkja þessari spilamennsku FH við spilamennsku Chelsea. Þeir voru mikið með boltann en voru í miklum vandræðum með að skapa alvöru færi.

Pétur Viðarsson varð sér til skammar í kvöld er hann fékk beint rautt spjald á 71. mínútu. „Ertu fokking þroskaheftur?“ sagði Pétur við aðstoðardómara í kvöld og fékk að launum beint rautt spjald.

Maður bjóst við nýju FH liðið þetta sumarið en frammistaða kvöldsins var bara alveg eins og liðið spilaði í fyrra. Virkaði hálf vonlaust.

Það leit oft út fyrir að eitt lið væri að nenna þessu. Það voru Skagamenn og áttu þeir sigurinn fyllilega skilið.

FH voru oft við það að vera líklegir en það vantaði alvöru grimmd og var meira hungur í þeim gulu.

Agaleysi lýsir leiknum líka mjög vel. Guðmundur Kristjánsson var heppinn að fá ekki sjálfur beint rautt spjald í seinni hálfleik fyrir að missa stjórn á skapi sínu.

Skagamenn áttu þá að fá vítaspyrnu í fyrri hálfleik en Pétur dæmdi ekkert. Boltinn fór í hönd FH-ings innan teigs en ekkert dæmt.