3. umferð Pepsi Max-deildar karla lauk í gær þegar Fylkir náði í stig á Meistaravöllum gegn KR.

Á föstudag unnu Blikar góðan sigur á Víkingum, á sama tíma vann FH öflugan sigur á KA.

Stjarnan lagði HK á heimavelli. Á laugardag gerðu ÍBV og Grindavík 2-2 jafntefli.

Krísan á Hlíðarenda heldur áfram en liðið tapaði gegn ÍA á laugardagsvöldið.

Sóknin gerir upp þessa 3. umferð hér að neðan en þátturinn er í boði Pepsi Max. Gestur þáttarins er Hrafn Norðdahl.

Landsliðsmarkvörðurinn Hannes Þór Halldórsson kom fyrir í þættinum en hann gekk í raðir Vals fyrir mót.

Hannes hefur kannski ekki alveg staðið undir væntingum hjá Val sem og allir aðrir leikmenn liðsins. Liðið er með eitt stig eftir þrjár umferðir.

Það er þó ekki rétt að kenna Hannesi um gengi liðsins eins og margir vilja gera, þó að hann sé mögulega stærsta nafn deildarinnar.

,,Hannes Þór Halldórsson kom í mark Vals fyrir tímabilið og hann virðist ætla að vera svona auðveldur púði fyrir menn að kýla í ef Valsmönnum gengur illa,“ sagði Hörður Snævar Jónsson, ritstjóri 433.is.

,,Vissulega greip hann að einhverju leyti í tómt í öðru marki ÍA en það verður að segjast eins og er að varnarmenn liðsins hefðu getað hjálpað honum betur.“

,,Ég ætla að segja fyrir mitt leyti að það eru margir aðrir í liði Vals en Hannes sem þurfa að stíga upp. Hann er auðveldur maður til að kýla í.“

Hrafn tók undir með Herði í þessari umræðu og segir það rangt að kenna Hannesi um gengi meistarana.

,,Hann er ekkert svosem búinn að vera stórstjarna í byrjun en heldur ekki neinn blóraböggull skilurðu,“ sagði Hrafn.

,,Þetta er ekki honum að kenna, að þeir séu komnir með eitt stig. Það er ekki Hannesi að kenna sko.“